A Asociación Comarcal de Empresarios (ACE) é unha organización independente que ten como finalidade principal a representación, defensa e promoción dos intereses económicos, sociais, profesionais e culturais dos empresarios e autónomos da Estrada e arredores. Nada fai máis de corenta anos, é unha das asociacións de empresarios máis antigas da nosa comunidade autónoma. O primeiro dirixente da ACE foi D. Jesús José Fernández Novoa Rodríguez, que cesou no seu cargo en 1971 ao presentarse como candidato á alcaldía da Estrada. A el relevouno, D. Alfonso Varela Vázquez que estivo á fronte durante 25 anos, ata que en 1994, D. Gonzalo Figueiras tomou as rendas do colectivo.

Na actualidade, a xunta directiva foi elixida na asemblea xeral extraordinaria celebrada o día 16 de maio de 2017 e está integrada por 12 membros, todos eles con negocios propios na zona.

No deseño deste equipo están representados o maior número de sectores económicos posibles, aínda que tamén é necesario destacar a ilusión e ganas de traballar por un futuro mellor para todos os empresarios da comarca.

A asociación agrupa a máis de 400 afiliados, que desenvolven a súa actividade en subsectores, pertencendo a maioría deles a áreas de comercio, hostalería, servizos e construción. O obxectivo fundamental da ACE é amparar os dereitos, en todos os ámbitos, dos empresarios. Tamén promocionar e revitalizar os sectores mediante a mellora e a modernización dos mesmos co fin de conseguir unha calidade óptima dos seus servizos; a creación de oportunidades entre socios; o fomento e desenvolvemento dun tecido empresarial; a representación dos empresarios estradenses e da zona nas institucións gobernamentais; a prestación de servizos propios como o emprego, formación, tramitación de subvencións, información e consultas, convenios e goce das instalacións; e a colaboración e contacto con todas as organizacións precisas en busca do mellor para o empresario.